۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پنڈت لبھو رام دنیائے ادب میں جوش ملسیانی کے نام سے جانے گئے۔
یکم فروری 1884 کو ملسیان، جالندھر میں پیدا ہوئے۔ دادا نہال چند گڑ کا کاروبار کرتے تھے۔ والد پنڈت موتی رام بھی ان پڑھ تھے۔ پشاور کے قصہ خوانی بازار میں ان کی مٹھائی کی دکان تھی۔ والدہ نے بڑی محنت مشقت سے جوش کو تعلیم دلوائی۔
انہوں نے 1897 میں ورنیکلر مڈل کا امتحان پاس کیا۔ جالندھر کے کئی اسکولوں میں درس و تدریس کا فریضہ انجام دیا۔
خانہ نشینی کے ایام میں شعر و شاعری اور شطرنج سے شغل فرماتے تھے۔ شطرنج کے متعلق ایک بیاض بھی مرتب کی۔ شعر گوئی طالبعلمی کے زمانے میں ہی شروع ہو گئی تھی۔ مدتوں کلام پر اصلاح نہیں لی۔ جن دنوں وکٹر ہائی اسکول جالندھر میں پڑھاتے تھے کہیں سے داغ کے مشہور شاگرد سید شبر حسن نسیم بھرت پوری کا دیوان ہاتھ لگ گیا۔ اس کے بعد زبان اور فن کی کوئی بھی حل طلب بات ہوتی تو خط کے ذریعے ان سے پوچھ لیتے۔انہی کے توسط سے داغ کی شاگردی بھی اختیار کی۔
نثر میں ان کی سب سے اہم تصنیف دیوان غالب مع شرح 1950 ہے۔
ایک زمانے میں اقبال کے کلام پر ان کے مضامین کا ایک سلسلہ ہفتہ وار پارس لاہور میں جراح کے قلمی نام سے چھپا۔ ماہنامہ آجکل کی ادارت بھی کی۔
1971 میں ان کو پدم شری کے اعزاز سے نوازا گیا۔پنڈت بال مکند عرش ملسیانی ان کے اکلوتے بیٹے تھے۔
ان کی تصانیف میں’بادۂ سرجوش‘، ’جنون و ہوش‘، ’فردوس گوش‘(منظومات و غزلیات)، ’نغمۂ سروش‘ (رباعیات)، ’دستورالقواعد فارسی‘، ’مکتوبات جوش‘اور ’منشورات جوش‘قابل ذکر ہیں۔
27 جنوری 1976 کو نکودر میں ان کا انتقال ہو گیا۔
اس وہم سے کہ نیند میں آۓ نہ کچھ خلل
احباب زیرِ خاک سلا کے چلے گۓ
۔۔۔۔۔۔۔۔۔۔۔۔۔۔۔۔۔۔۔۔
منتخب کلام:
نالہء جاں گزاز نے مارا
سوز الفت کے ساز نے مارا
یہ کہا پڑھ کے میرا نامہء شوق
اس سراپا نیاز نے مارا
منہ سے اف بھی تو کر نہیں سکتے
خوف افشاۓ راز نے مارا
زندگی چین سے گزرتی تھی
چشم نظارہ باز نے مارا
داد بھی شوق دید کی نہ ملی
جلوہء بے نیاز نے مارا
موت کی زد سے بچ گیا جو کوئی
اس کو عمر دراز نے مارا
انگلیاں ہر طرف سے اٹھتی ہیں
طرہء امتیاز نے مارا
کوئی دم ساز کوئی ہے جاں باز
آپ کے ساز باز نے مارا
۔۔۔۔۔۔۔۔۔۔۔۔۔۔
حوادث پر نہ اے ناداں نظر کر
قضا سے جنگ بے خوف و خطر کر
معافی بھی سزا سے کم نہیں ہے
بس اب اس درگزر سے درگزر کر
جہاں ڈوبی تھی کشتی آرزو کی
اسی گرداب میں نکلی ابھر کر
کبھی تو مائل ترک ستم ہو
کبھی مجھ پر کرم کی بھی نظر کر
گزارا تو یہاں مشکل ہے اے دل
مگر اب جس طرح بھی ہو گزر کر
وہ مجھ خونیں کفن سے پوچھتے ہیں
کہاں جانے لگے ہو بن سنور کر
وہی ہستی کا چکر ہے یہاں بھی
بھنور ہی میں رہے ہم پار اتر کر
مری مختاریوں کے ساتھ یارب
مری مجبوریوں پر بھی نظر کر
نۓ عالم ادھر بھی ہیں ادھر بھی
یہی دیکھا دو عالم سے گزر کر
بیان درد دل اے جوشؔ کب تک
خدارا اب یہ قصہ مختصر کر
۔۔۔۔۔۔۔۔۔۔۔۔۔۔
بحث میں دونوں کو لطف آتا رہا
مجھ کو دل میں دل کو سمجھاتا رہا
ان کی محفل میں دل پر اضطراب
ایک شعلہ تھا جو تھراتا رہا
موت کے دھوکے میں ہم کیوں آ گۓ
زندگی کا بھی مزا جاتا رہا
ناشگفتہ ہی رہی دل کی کلی
موسم گل بارہا آتا رہا
جب سے تم نے دشمنی کی اختیار
اعتبار دوستی جاتا رہا
اپنی ہی ضد کی دل بے تاب نے
ان کے در تک بھی میں سمجھاتا رہا
جور تو اے جوشؔ آخر جور ہے
لطف بھی ان کا ستم ڈھاتا رہا
۔۔۔۔۔۔۔۔۔۔۔۔۔۔
زندگی کچھ بھی نہیں سوز محبت کے بغیر
آگ اس دل کو لگے جو نہیں خواہاں تیرا
قلزم عشق کے طوفان سے بچنا معلوم
اے دل زار اب اللہ نگہباں تیرا
کیوں گل تر کو میں آئینے سے تشبیہ نہ دوں
اس میں آتا ہے نظر چہرہء خنداں تیرا
حوض کوثر بھی ہو اس جام پہ صدقے سو بار
جس میں مجھ کو نظر آۓ رخ تاباں تیرا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تیری یاد میں کب قیامت نہ ٹوٹی ترے غم میں کب حشر برپا نہ دیکھا
بجز اک نگاہ مسیحا نفس کے محبت کے ماروں نے کیا کیا نہ دیکھا
بہت سیر کی باغ جنت کی ہم نے مگر کچھ مزا زندگی کا نہ دیکھا
کسی دل میں درد محبت نہ پایا کسی دل میں داغ تمنا نہ دیکھا
بہت مرد میداں بھی دنیا میں دیکھے شجاعت پہ نازاں بھی دنیا میں دیکھے
مگر چوٹ سہہ جاۓ تیر نظر کی یہ دل پہ کلیجا کسی کا نہ دیکھا
یہی ہے نظارا تو کیا ہے نظارا نہ شان جمالی نہ شان جمالی
یہ دھندلا سا پرتو یہ مستور جلوہ برابر ہے ہم کو تو دیکھا نہ دیکھا
جنون محبت میں دیوانگی میں تری بے رخی کا بھی میں قدرداں ہوں
بڑا تو نے احسان مجھ پر کیا یہ تماشا بنا کر تماشا نہ دیکھا
ترے آستاں کا پتہ کس سے پائیں کرے رہبری کون بھٹکے ہوؤں کی
یہ راہ طلب ہے کہ راہ عدم ہے کسی کا بھی نقش کف پا نہ دیکھا
محبت کہاں یہ تو بے چارگی ہے ستم بھی سہیں پھر کرم اس کو سمجھیں
یہ جبر اس لیے کر لیا ہے گوارا کہ اس کے سوا کوئی چارہ نہ دیکھا
نیاز محبت سے یہ بے نیازی خلوص محبت سے اتنا تغافل
مرا درد تم نے مرا حال تم نے نہ جانا نہ سمجھا نہ پوچھا نہ دیکھا
تمھیں جوشؔ ہم خوب پہچانتے ہیں تمھاری بلا نوشیاں جانتے ہیں
کہاں تم کہاں پارسائی کا جامہ کبھی ہم نے ایسا دکھاوا نہ دیکھا
۔۔۔۔۔۔۔۔۔۔۔۔۔۔
رہا پیشِ نظر حسرت کا باب اول سے آخر تک
پڑھی کس نے محبت کی کتاب اول سے آخر تک
اشارہ تک نہ لکھا کوئی اس نے ربط باہم کا
بہت بے ربط ہے خط کا جواب اول سے آخر تک
میسر خاک ہوتا زندگی میں لطف تنہائی
رہے دو دو فرشتے ہم رکاب اول سے آخر تک
خوشی میں بھی محبت دشمن صبر و سکوں نکلی
رہا دل میں وہی اک اضطراب اول سے آخر تک
غلط کوشی کی عادت نے اثر پیدا کیا ایسا
غلط نکلا گناہوں کا حساب اول سے آخر تک
مجھے لے آئی ہے عمر رواں کن خارزاروں میں
ہوا ہے چاک دامانِ شباب اول سے آخر تک
مجالِ گفتگو پائی تو اب کیوں مہر بر لب ہے
سنا دے او دلِ غفلت مآب اول سے آخر تک
اندھیرے میں تلاشِ دل اگر ہوتی تو کیا ہوتی
شبِ تاریک تھا دورِ شباب اول سے آخر تک
دہانِ زخم سے بھی جوشؔ حالِ دل سنا دیکھا
نمک پاشی ہی تھا ان کا جواب اول سے آخر تک
۔۔۔۔۔۔۔۔۔۔۔۔۔۔
وطن کی سر زمیں سے عشق و الفت ہم بھی رکھتے ہیں
کھٹکتی جو رہے دل میں وہ حسرت ہم بھی رکھتے ہیں
ضرورت ہو تو مر مٹنے کی ہمت ہم بھی رکھتے ہیں
یہ جرأت یہ شجاعت یہ بسالت ہم بھی رکھتے ہیں
زمانے کو ہلا دینے کے دعوے باندھنے والو
زمانے کو ہلا دینے کی طاقت ہم بھی رکھتے ہیں
بلا سے ہو اگر سارا جہاں ان کی حمایت پر
خدائے ہر دو عالم کی حمایت ہم بھی رکھتے ہیں
بہار گلشن امید بھی سیراب ہو جائے
کرم کی آرزو اے ابر رحمت ہم بھی رکھتے ہیں
گلہ نا مہربانی کا تو سب سے سن لیا تم نے
تمہاری مہربانی کی شکایت ہم بھی رکھتے ہیں
بھلائی یہ کہ آزادی سے الفت تم بھی رکھتے ہو
برائی یہ کہ آزادی سے الفت ہم بھی رکھتے ہیں
ہمارا نام بھی شاید گنہ گاروں میں شامل ہو
جناب جوشؔ سے صاحب سلامت ہم بھی رکھتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ترتیب و انتخاب و پیشکش
نیرہ نور خالد