معروف شاعر عنوانؔ چشتی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نام افتخار الحسن اورتخلص عنوان تھا۔ وہ 5 فروری 1937ءقصبہ منگلور، ضلع سہارن پور(اترانچل) میں پیدا ہوئے۔
ایم اے (جغرافیہ) ایم اے (اردو) کے بعد پی ایچ ڈی کی ڈگری حاصل کی ۔
جامعہ ملیہ اسلامیہ میں لکچرر،ریڈر، پروفیسر اور صدرشعبہ اردو رہے اور وہیں پر ڈین فیکلٹی کے منصب سے 1997ءمیں ریٹائر ہوئے۔
انھیں ابر احسنی گنوری سے تلمذ حاصل تھا۔
وہ یکم فروری 2004ءکو نوئیڈا میں انتقال کرگئے۔
انھوں نے تقریبا چالیس علمی اور ادبی کتابیں تصنیف کی ہیں۔ چند تصانیف کے نام یہ ہیں:
’ذوق جمال‘، ’نیم باز‘(شعری مجموعے)، ’عکس وشخص‘(شخصیات)، ’تنقیدی پیرائے‘، ’اردو شاعری میں ہیئت کے تجربے‘، ’اردو شاعری میں جدیدیت کی روایت‘، ’عروض اور فنی مسائل‘، ’تنقید سے تحقیق تک‘، ’مکاتیب احسن‘(مقدمہ وحواشی ۔جلد اول ودوم)۔
ان کو اردو اکادمی ، دہلی نے1991ء میں اردو شاعری ایوارڈ سے نوازا۔ اس کے علاوہ ان کو مختلف اداروں ، انجمنوں اور اکادمیوں نے متعدد ایوارڈ عطا کیے۔
موصوف ایک دانشور، سیرت نگار، تنقید نگار، شاعر، ماہر عروض اور استاد شاعر کے طور پر جانے جاتے تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منتخب کلام:
نعت
خدا اُس کا محافظ ہے جو ہے گلشن محمدﷺ کا
جلا سکتی نہیں بجلی کوئی، خرمن محمدﷺ کا
یہ وہ نعمت ہے ، جس کو حاصلِ دنیا و دیں کہیۓ
خدا شاہد ہے کافی ہے مجھے دامن محمدﷺ کا
حدیث عشق ہے یہ اس کو اہل دل سمجھتے ہیں
خدا کا ہے وہ دشمن جو کہ ہے دشمن محمدﷺ کا
مری بے اختیاری پر نہ جاؤ مجھ کو کافی ہے
لبوں پر نام اللہ ہاتھ میں دامن محمدﷺ کا
وہ صحرا تھا ، جسے بادِ خزاں تاراج کرتی تھی
بہارِ جاوداں ہے واقعی گلشن محمدﷺ کا
1986ء( کتاب " چاند چکور اور چاندنی)
۔۔۔۔۔۔۔۔۔۔۔۔۔
عشق پھر عشق ہے آشفتہ سری مانگے ہے
ہوش کے دور میں بھی جامہ دری مانگے ہے
ہاۓ آغازِ محبت میں وہ خوابوں کے طلسم
زندگی پھر وہی آئینہ گری مانگے ہے
دل جلانے پہ بہت طنز نہ کر اے ناداں
شبِ گیسو بھی جمالِ سحری مانگے ہے
میں وہ آسودہء جلوہ ہوں کہ تیری خاطر
ہر کوئی مجھ سے مری خوش نظری مانگے ہے
تیری مہکی ہوئی زلفوں سے بہ اندازِ جبیں
جانے کیا چیز نسیم سحری مانگے ہے
آپ چاہیں تو تصور بھی مجسم ہو جاۓ
ذوقِ آذر تو نئی جلوہ گری مانگے ہے
حُسن ہی تو نہیں بیتابِ نمائش عنواںؔ
عشق بھی آج نئی جلوہ گری مانگے ہے
۔۔۔۔۔۔۔۔۔۔۔۔۔۔۔۔۔۔۔
دل ہے یوں سر بگر بیانِ وفا
حُسن کا پاسِ ادب ہو جیسے
آپ کی جُنبش لب کیا کہیۓ
مژدہء شامِ طرب ہو جیسے
یوں بھی گزرا تری یادوں کا جلوس
دل میں اک جشنِ طرب ہو جیسے
یوں مجھے ناز سے دیکھا اُس نے
ہر ادا داد طلب ہو جیسے
کتنی مغرور ہے لیلاۓ بہار
اس میں کچھ آپ کی چھب ہو جیسے
یوں پلٹ آیا گلی سے تیری
یہ مری حدِ ادب ہو جیسے
بزمِ جاناں میں ہے چپ یوں عنواںؔ
یہ بھی اک حپسنِ طلب ہو جیسے
۔۔۔۔۔۔۔۔۔۔۔۔۔۔۔۔۔۔۔۔
رات کئی آوارہ سپنے آنکھوں میں لہراۓ تھے
شاید وہ خود بھیس بدل کر نیند چرانے آۓ تھے
جیون کے وہ پیاسے لمحے برسوں میں راس آۓ تھے
رات تری زلفوں کے بادل مستی میں لہراۓ تھے
ہاۓ وہ مہکی مہکی راتیں ہاۓ وہ بہکے بہکے دن
جب وہ میرے مہماں بن کر میرے گھر آۓ تھے
تم کو بھی آغازِ محبت یاد تو ہو گا کم سے کم
پہلے پہل ملتے ہی نظریں ہم دونوں شرماۓ تھے
ہاۓ وہ ربط وضبطِ محبت ہاۓ یہ پاسِ شرطِ وفا
آج نہ ملنے پر بھی خوش ہیں کل مل کر پچھتاۓ تھے
۔۔۔۔۔۔۔۔۔۔۔۔۔۔۔۔۔۔
نظر کی چوٹ اب دل پر عیاں ہوتی ہے
کہاں چمکی تھی یہ بجلی کہاں معلوم ہوتی ہے
کبھی خنداں کبھی یہ کناں معلوم ہوتی ہے
محبت امتحاں در امتحاں معلوم ہوتی ہے
بہ ایں گلشن پرستی اس کا حق ہے موسمِ گُل پر
جسے بجلی چراغِ آشیاں معلوم ہوتی ہے
محبت کو تعین کی حدوں میں ڈھونڈنے والو
محبت ماوراۓ دو جہاں معلوم ہوتی ہے
یہاں تک اب غم دل کی نزاکت آ گئی عنواںؔ
نگاہِ لُطف بھی دل پر گراں معلوم ہوتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ خالد محمود