مشہور و معروف شاعر علامہ سیماب اکبر آبادی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ﺳﯿﻤﺎﺏ ﺍﮐﺒﺮ ﺁﺑﺎﺩﯼ ﺍﺭﺩﻭ ﮐﮯ ﻧﺎﻣﻮﺭ ﺍﻭﺭ ﻗﺎﺩﺭﺍﻟﮑﻼﻡ ﺷﺎﻋﺮ ﺗﮭﮯ۔ ﺍﻥ ﮐﺎ ﺍﺻﻞ ﻧﺎﻡ ﻋﺎﺷﻖ ﺣﺴﯿﻦ ﺻﺪﯾﻘﯽ ﺗﮭﺎ۔
ﺳﯿﻤﺎﺏ ﺁﮔﺮﮦ ، ﺍﺗﺮ ﭘﺮﺩﯾﺶ ، ﻣﯿﮟ ﭘﯿﺪﺍ ﮨﻮﺋﮯ۔ ﺍﻧﮑﮯ ﻭﺍﻟﺪ ، ﻣﺤﻤّﺪ ﺣﺴﯿﻦ ﺻﺪﯾﻘﯽ ﺑﮭﯽ ﺷﺎﻋﺮ ﺍﻭﺭ ﺣﮑﯿﻢ ﺍﻣﯿﺮﺍﻟﺪﯾﻦ ﺍﺗﺘﺎﺭ ﺍﮐﺒﺮﺁﺑﺎﺩﯼ ﮐﮯ ﺷﺎﮔﺮﺩ ﺗﮭﮯ ﺍﻭﺭ ﭨﺎﺋﻤﺰ ﺁﻑ ﺍﻧﮉﯾﺎ ﭘﺮﯾﺲ ﻣﯿﮟ ﻣﻼﺯﻡ ﺗﮭﮯ۔
ﺳﯿﻤﺎﺏ ﻧﮯ ﻓﺎﺭﺳﯽ ﺍﻭﺭ ﻋﺮﺑﯽ ﮐﯽ ﺗﻌﻠﯿﻢ ﺟﻤﺎﻝﺍﻟﺪﯾﻦ ﺳﺮﺣﺪﯼ ﺍﻭﺭ ﺭﺷﯿﺪ ﺍﺣﻤﺪ ﮔﻨﮕﻮﻟﯽ ﺳﮯ ﺣﺎﺻﻞ ﮐﯽ۔ 1892 ﺳﮯ ﺷﻌﺮ ﮐﮩﻨﺎ ﺷﺮﻭﻉ ﮐﺮ ﺩﯾﺎ ﺗﮭﺎ ﺍﻭﺭ 1898 ﻣﯿﮟ ﻣﺮﺯﺍ ﺧﺎﻥ ﺩﺍﻍ ﺩﮨﻠﻮﯼ ﮐﮯ ﺷﺎﮔﺮﺩ ﮨﻮ ﮔﺌﮯ ﺗﮭﮯ۔ 1923 ﻣﯿﮟ ﻗﺼﺮ ﺍﻻﺩﺏ ﮐﯽ ﺑﻨﯿﺎﺩ ﺭﮐﮭﯽ ﺍﻭﺭ ﭘﮩﻠﮯ " ﭘﯿﻤﺎﻧﮧ " ﺍﻭﺭ ﺑﻌﺪ ﻣﯿﮟ 1929 ﻣﯿﮟ " ﺗﺎﺝ " ﺍﻭﺭ 1930 ﻣﯿﮟ " ﺷﺎﻋﺮ " ﺷﺎﺋﻊ ﮐﺮﻧﺎ ﺷﺮﻭﻉ ﮐﯿﮯ۔ ﭘﯿﻤﺎﻧﮧ 1932 ﻣﯿﮟ ﺑﻨﺪ ﮨﻮ ﮔﯿﺎ ﺗﮭﺎ۔
ﺳﯿﻤﺎﺏ ﮐﺎ ﭘﮩﻼ ﻣﺠﻤﻮﻋﮧِ ﮐﻼﻡ " ﻧﯿﺴﺘﺎﮞ " 1923 ﻣﯿﮟ ﭼﮭﭙﺎ ﺗﮭﺎ۔ ﺍﻧﮑﯽ ﻟﮑﮭﯽ 70 ﮐﺘﺎﺑﻮﮞ ﻣﯿﮟ 22 ﺷﻌﺮﯼ ﻣَﺠﻤُﻮﻋﮯ ﮨﯿﮟ ﺟﻦ ﻣﯿﮟ " ﻭﮨﯽ ﻣﻨﻈﻮﻡ " ﺑﮭﯽ ﺷﺎﻣﻞ ﮨﮯ ﺟﺲ ﮐﯽ ﺍﺷﺎﻋﺖ ﮐﯽ ﮐﻮﺷﺶ 1949 ﻣﯿﮟ ﺍﻧﮑﻮ
ﭘﺎﮐﺴﺘﺎﻥ ﻟﮯ آئی ﺟﮩﺎﮞ ﮐﺮﺍﭼﯽ ﻣﯿﮟ 31 جنوری 1951 ﻣﯿﮟ ﺍﻧﮑﺎ ﺍﻧﺘﻘﺎﻝ ﮨﻮﺍ۔
بشکریہ وکی پیڈیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سیمابؔ اکبرآبادی کا شمار ان خوش نصیب شعرأ میں ہوتا ہے، جنھیں گزرتے وقت کے ساتھ فراموش نہیں کیا گیا۔ اکبرآباد موجودہ آگرہ میں جون ۱۸۸۰ میں پیدا ہونے اس شاعر کو لوگ آج بھی اسی شان سے ان کے زبان زد خاص و عام اشعار کے ساتھ یاد کرتے ہیں ۔ سیماب اکبرآبادی کا اصل نام عاشق حسین اور ان کے والد کا نام مولوی محمد حسین تھا ۔ ان کا شمار بیسویں صدی کے اوائل کے ان شعراء میں ہوتا ہے جنہوں نے مختلف اصناف سخن مثلاً غزل، نظم، قصیدہ ، رباعی، مثنوی، مرثیہ، سلام ، نوحہ اور نعت وغیرہ میں فکری و فنّی التزام کے ساتھ کامیاب اور صحت مند تجربے کرکے شہرت اور مقبولیت حاصل کی۔
میخانۂ سخن کا گدائے قدیم ہوں
ہر رنگ کی شراب پیالے میں ہے مرے
(سیمابؔ)
سیمابؔ غزل کے سلسلے میں ہمیشہ تذبذب کے شکار رہے ۔ اس کی وجہ میرے خیال میں اس وقت ایک جانب غزل کی مقبولیت اور دوسری طرف حالیؔ وغیرہ کی مخالفت تھی جس کی بنا پر سیمابؔ کہتے نظر آتے ہیں کہ ۔
’’ ایک غزل کی جامعیت بعض اوقات ہزاروں نظموں سے بڑھ جاتی ہے۔‘‘
(کلیم عجم۔ خطبات ،۲)
دوسری طرف سیماب ؔ کا یہ خیال بھی ملتا ہے کہ___
میں غزل میں پاکیزہ تغزل کا مخالف نہیں ، لیکن شاعری کو محض تغزل تک محدود رکھنا بھی نہیں چاہتا ، میں جانتا ہوں کہ اردو شاعری میں غزل اس وقت ایک مدقوق مریضہ کی حیثیت رکھتی ہے اور اندیشہ ہے کہ اگر اسے صحیح صورت میں زندہ رکھنے کی کوشش نہیں کی گئی تو وہہمیشہ کے لئے فنا ہو جائے گی۔‘‘
اس کے بعد سیمابؔ اپنے خیال کو بھی رد کرتے ہیں اور فرماتے ہیں:
’’ میں نظم کو غزل پر ترجیح دیتا ہوں اور چاہتا ہوں کہ شعراء غزل سے زیادہ نظم گوئی کی طرف متوجہ ہوں ۔ اس لئے کہ غز ل جس چیز کا نام ہے ، وہ اپنی قدامت و کہنگی کی وجہ سے اب زیادہ کار آمد نہیں رہی۔ شعرا ء منتفر نہاس صنف کو بہ تمام و کمال پامال اور ختم کرچکے ہیں___منتہیٰ شعراء کے لئے بھی غزل میں اجتہاد ایجاد کی گنجائش بہت کم باقی ہے ۔مگر نظم کا میدان ہنوز وسیع ہے۔اور یہ صنف سخن اردو شاعری کو کارآمد اور مفید بنا سکتی ہے اس لئے زیادہ تر توجہ اس کی طرف ہونا چاہئے۔‘‘
سیمابؔ نظم کو غزل پر کیوں ترجیح دیتے ہیں اس کی وجہ سیمابؔ کے عہد کی غزلوں کے مطالعہ سے واضح ہو جاتی ہے ۔ اور ان اسباب کا بھی پتا چلتا ہے ، جن کے باعث سیمابؔ نے غزل کو قدامت پسند صنف سخن ٹھہرایا اور اس کی جانب توجہ نہ دینے کی تلقین کی۔
سیمابؔ جس عہد میں سانس لے رہے تھے اس عہد اور اس زمانہ میں انسان مختلف قسم کے مسائل سے دوچار تھا ۔غلامی کا طوق گلے میں تھا ۔ عزت وقار ، خاندانی روایتیں اور قدریں دم توڑتی نظر آرہی تھیں ۔ روزی روٹی کا مسئلہ عفریت کی طرح سامنے کھڑا تھا ۔ انقلابی طاقتیں بھی سر ابھار رہی تھیں ۔ان حالات میں ہمارے شعراء جن کے بارے میں کہا جاتا ہے کہ وہ وقت کا نباض ہوتا ہے ۔ وہ حسن و عشق ، جام و صبواور شمع و پروانہ کی باتیں اپنی غزلوں میں کررہے تھے ۔ اس امر کو ایک حساس شاعر کیونکر برداشت کرسکتا تھا۔ اس لئے سیمابؔ یہ کہنے پر مجبور ہوئے کہ ___
’’ ایک شاعر اگر اسے اپنے فرض کا احساس ہے اور وہ زمانہ کا نبض شناس ہے توہزاروں نبرد آزما جوانوں سے بہتر ہے۔‘‘
سیمابؔ ہمیشہ شاعری میں صحت مند رویے کے پیرو کا ر رہے اور وہ چاہتے تھے کہ وہ دوسرے شعراء خواہ وہ ان کے ہم عصر ہوں یا ان کے شاگرد ، شاعری میں حسن و عشق ، گل و بلبل، شمع و پروانہ اور جام وصبو وغیرہ جیسے پرانے اور روایتی موضوعات کو جگہ دے کر صرف تفریح کا ذریعہ نہ بنائیں بلکہ وقت کے اہم تقاضوں کو سمجھیں اور بلند خیالی اور بلند نگاہی کے ساتھ ساتھ اپنے مشاہدے اور مطالعے کا ثبوت دیتے ہوئے اول درجہ کی شاعری کا نمونہ پیش کریں اور شاعری کے وقار اور عظمت کو بلند کریں ۔ گیا (بہار) میں منعقدہ ۲۴؍ دسمبر ۱۹۲۲ء کے ایک مشاعرے میں اپنے پہلے خطبہ میں سیمابؔ نے ان ہی باتوں کی جانب اشارہ کیا تھا۔
’’ اردو شاعری کی اجزائے ترکیبی جب تک صرف گل و بلبل ، شمع و پروانہ ، سرو قمری اور شانہ و زلف سے وابستہ رہے ، شاعری کو صرف تفریح کی خاطر ایک ذریعۂ مسرور سمجھی گئی ۔ لیکن قدرت نے لکھنؤ، دہلی اور پانی پت کے بعض فاضل عمائدین کے دماغ کو انوار شاعری سے تجلی کرکے دنیائے سخن کی فضائے بسیط پر رشد و ہدایت کی بجلیاں چمکائیں۔‘‘
لیکن ایسی بات بھی نہیں کہ ایسی شاعری جس کے سیمابؔ مخالف تھے ، صرف غزلوں میں ہی پائی جاتی تھیں ۔ بلکہ اس زمانے کی نظموں میں بھی اسی طرح کے اظہار جگہ پاتے تھے۔پھر بھی غزل کی مقبولیت میں کمی نہیں آئی ۔جس وجہ کر سیمابؔ اس سلسلے میں برابر تذبذب میں مبتلا رہے اور خود بھی خوب سے خوب تر غزلیں کہتے رہے۔لیکن اس احتیاط کے ساتھ کہ
شگفتِ خاطر اے سیمابؔ تھی جو شاعری پہلے
طبیعت پر وہ اب اک بار سا معلوم ہوتی ہے
سیماب ؔکی غزلیں ’’کلیم عجم ‘‘ سدرۃ المنتہیٰ سے ’’لوح محفوظ‘‘ تک پہنچتے پہنچتے ان کے فکرو خیال کی بلندی ، احساسات و جذبات کی رنگا رنگی ، حیات و کائنات کی تنقید ، تفسیر اور تعبیر تمام تر فنی بالیدگیوں کے ساتھ نظر آنے لگی تھیں اور اپنے مخصوص اور منفرد لب و لہجہ کی وجہ کر اپنے ہم عصر شعراء میں بہت زیادہ شہرت اور مقبولیت حاصل کرچکی تھی ۔ جس سے ان کے ہم عصر شعرا ء کو حسد کا موقع ملا ۔ خاص طور پر سیماب ؔ کی غزل کا ایک شعر
وہ سجدہ کیا رہے احساس جس میں سر اٹھانے کا
عبادت اور بقید ہوش توہین عبادت ہے
اس سے مخالفت بڑھی اور ان کے ہم عصروں کو موقع ملا کفر کا فتویٰ صادر کرنے کا۔لیکن سیمابؔ نے کبھی ان سب باتوں کی پرواہ کی اور نہ ان فضولیات میں پڑے ۔بلکہ اپنے فکر و فن ،احساس و جذبات ، مطالعہ و مشاہدہ سے اردو شاعری کا دامن بھرتے رہے۔
’’کلیم عجم‘‘ اور سدرۃ المنتہیٰ ‘‘ سے ’’لوح محفوظ‘‘ تک سیماب ؔاکبر آبادی کی غزلیہ شاعری کا سفر خاصا طویل رہا ہے اور اس طویل سفر کا جائزہ لیا جائے تو اندازہ ہوتا ہے کہ آج جو غزلوں کا مزاج اور معیار بدلا ہوا دیکھنے کو مل رہا ہے اس کا کریڈٹ کسی حد تک سیمابؔ کو جاتا ہے کیونکہ سیمابؔ نے ہمیشہ ایسی غزلوں کی مخالفت کی جو صرف تفریح طبع کے لئے کی جاتی رہیں اور عصری مسائل اور عصری تقاضوں سے لا تعلق رہیں اس کے برعکس سیماب ؔنے اپنے ارد گرد کے حالات کا بغور مطالعہ و مشاہدہ کیا۔ اور انہیں اپنی غزلوں میں ایک نئے رنگ و آہنگ کے ساتھ پیش کیا ۔اسی لئے برسوں قبل کہے ہوئے سیمابؔ کے اشعار آج کے شاعرانہ مزاج کی نمائندگی کررہے ہیں ۔اس ضمن میں چند اشعار ملاحظہ فرمائیں۔
ہاۓ سیماب اس کی مجبوری
جس نے کی ہو شباب میں توبہ
۔۔۔۔۔۔۔۔۔۔۔۔۔۔۔۔۔۔۔۔
سیماب دل حوادث دنیا سے بجھ گیا
اب آرزو بھی ترک تمنا سے کم نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تعجب کیا لگی گر آگ اے سیماب سینے میں
ہزاروں دل میں انگارے بھرے تھے لگ گئی ہو گی
۔۔۔۔۔۔۔۔۔۔۔۔۔۔۔۔۔۔۔۔۔۔۔
کیا ڈھونڈنے میں جاؤں کسی کو
اپنا مجھے خود پتا نہیں ہے
۔۔۔۔۔۔۔۔۔۔۔۔۔۔۔۔۔
بت کریں آرزو خدائی کی
شان تیری ہے کبریائی کی
۔۔۔۔۔۔۔۔۔۔۔۔۔۔۔۔۔
یہ شراب عشق اے سیماب ہے پینے کی چیز
تند بھی ہے بدمزہ بھی ہے مگر اکسیر ہے
۔۔۔۔۔۔۔۔۔۔۔۔۔۔۔۔۔
منزل ملی مراد ملی مدعا ملا
سب کچھ مجھے ملا جو ترا نقش پا ملا
۔۔۔۔۔۔۔۔۔۔۔۔۔۔۔۔۔۔۔۔۔
میں دیکھتا ہوں آپ کو حد نگاہ تک
لیکن میری نگاہ کا کیا اعتبار ہے
۔۔۔۔۔۔۔۔۔۔۔۔۔۔۔۔۔۔۔۔۔۔
کہانی میری روداد جہاں معلوم ہوتی ہے
جو سنتا ہے اسی کی داستاں معلوم ہوتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔
دنیا ہے خواب حاصل دنیا خیال ہے
انسان خواب دیکھ رہا ہے خیال میں
۔۔۔۔۔۔۔۔۔۔۔۔۔۔۔۔۔۔۔
دیکھتے رہتے ہیں چھپ چھپ کے مرقع تیرا
کبھی آتی ہے ہوا بھی تو چھپا لیتے ہیں
۔۔۔۔۔۔۔۔۔۔۔۔۔۔۔۔۔۔۔۔۔
سارے چمن کو میں تو سمجھتا ہوں اپنا گھر
جیسے چمن میں میرا کوئی آشیاں بنا
۔۔۔۔۔۔۔۔۔۔۔۔۔۔۔۔۔۔۔۔۔
گناہوں پر وہی انسان کو مجبور کرتی ہے
جو اک بے نام سی فانی سی لذت ہے گناہوں میں
۔۔۔۔۔۔۔۔۔۔۔۔۔۔۔۔۔۔۔۔۔
رنگ بھرتے ہیں وفا کا جو تصور میں ترے
تجھ سے اچھی تری تصویر بنا لیتے ہیں
۔۔۔۔۔۔۔۔۔۔۔۔۔۔۔۔۔۔
مرکز پہ اپنے دھوپ سمٹتی ہے جس طرح
یوں رفتہ رفتہ ترے قریب آ رہا ہوں میں
۔۔۔۔۔۔۔۔۔۔۔۔۔۔۔۔۔
صحرا سے بار بار وطن کون جاۓ گا
کیوں اے جنوں یہیں نہ اٹھا لاؤں گھر کو میں
۔۔۔۔۔۔۔۔۔۔۔۔۔۔۔۔۔۔۔۔۔۔۔
خلوص دل سے سجدہ ہو تو اس سجدے کا کیا کہنا
وہیں کعبہ سرک آیا جبیں ہم نے جہاں رکھ دی
۔۔۔۔۔۔۔۔۔۔۔۔۔۔۔۔۔۔۔۔۔
خدا اور ناخدا مل کے ڈبو دیں یہ تو ممکن ہے
میری وجہ تباہی صرف طوفان ہو نہیں سکتا
۔۔۔۔۔۔۔۔۔۔۔۔۔۔۔۔۔۔۔۔۔۔۔
دل کی بساط کیا تھی نگاہ جمال میں
اک آئینہ تھا ٹوٹ گیا دیکھ بھال میں
۔۔۔۔۔۔۔۔۔۔۔۔۔۔۔۔۔۔۔۔۔
مری خاموشیوں پہ دنیا مجھ کو طعن دیتی ہے
یہ کیا جانے کہ چپ رہ کر بھی کی جاتی ہیں تقریریں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ترے جلووں نے مجھے گھیر لیا اے دوست
اب تو تنہائی کے لمحے بھی حسیں لگتے ہیں
۔۔۔۔۔۔۔۔۔۔۔۔۔
بہت سارے ایسے اشعار سیمابؔ کی غزلوں میں ملتے ہیں جو انقلابیت، وطن دوستی ، ترک وطن کا کرب، وطن کی یاد، دوستوں کی رفاقت ، حیات و کائنات کے اسرار ورموز ، خدا کیقدرت اور اس کی کرشمہ سازیاں وغیرہ جیسے اہم موضوعات میں رومانیت و اشاریت کا حسین امتزاج موجود ہیں۔
سیماب ؔکی ابتدائی غزلوں میں رومانیت اور مناظرِ فطرت کی ایسی کیفیات پوری شدت کے ساتھ ملتی ہیں ،جس میں جذباتیت بھی ہے اور احساس کی رنگینیاں بھی ۔لیکن عریانیت یا عامیانہ اور سطحی باتوں کا کہیں پر بھی دخل نہیں ہے۔ اس سے سیمابؔ نے ہمیشہ پرہیز کیا۔
وقت تنہائی میں مشکل سے کٹے
تیرے وعدوں کا سہارا گر نہ ہو
٭
مطمح عشق کہاں حسن کم آویز کہاں
آپ کرتے ہیں وفا ، شرم مجھے آتی ہے
٭
حُسن دنیا میں ہے جب تک باقی
ترک دنیا مری نیّت میں نہیں
٭
جیسے جیسے سیمابؔ کا شعور بالیدہ ہوتا گیا ، وہ عصری تقاضوں اور سماجی، سیاسی اور معاشی مسائل سے رشتہ جوڑنے لگے اور بھر پور اشعار زندگی کی تمام تر نزاکتوں اور لطافتوں کے ساتھ پیش کیا ۔ اور اس پیشکش میں نئی ترکیبوں ، اصطلاحوں ، تشبیہوں اور استعاروں سے بھی کام لیا اور اشارے کنائے ،
بامعنی محاورے اور علامتوں کا استعمال کرکے ایوان غزل میں منفرد اور معتبر مقام بنایا!
سیماب اپنے زمانے میں ادبی طور پر کس قدر متحرک اور فعال تھے ، اس کا اندازہ ان کی ان گرانقدر کتابوں جیسے (۱) ساز و آہنگ (نظمیں)(۲) سدرۃ المنتہیٰ(غزلیں) ۱۹۴۶ء(۳)شعر انقلاب(نظمیں)۱۹۴۷ء(۴) عالم آشوب(تاریخی رباعیاں)۱۹۴۳(۵) کار امروز(نظموں کا اوّل مجموعہ) ۱۹۳۴ء(۶) کلیم عجم (غزلوں کا اوّل دیوان)۱۹۳۶ء(۷) لوح محفوظ (غزلوں کا تیسرا دیوان)۱۹۷۹ء(۸) نیستاں (نظمیں) ۱۹۲۵ء(۹) دستور الاصلاح(فن اصلاح پر کتاب)۱۹۴۰ء(۱۰) راز عروض (عروض پر اہم کتاب)۱۹۲۳ء وغیرہ سے لگایا جا سکتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نمونہ کلام:
شاید جگہ نصیب ہو اُس گُل کے ہار میں
میں پُھول بن کے آؤں گا، اب کی بہار میں
خَلوَت خیالِ یار سے ہے انتظارمیں
آئیں فرشتے لے کے اِجازت مزار میں
ہم کو تو جاگنا ہے ترے انتظار میں
آئی ہو جس کو نیند وہ سوئے مزار میں
اے درد! دل کوچھیڑکے، پھرباربارچھیڑ
ہے چھیڑ کا مزہ خَلِشِ باربارمیں
ڈرتا ہوں، یہ تڑپ کے لحد کو اُلٹ نہ دے
ہاتھوں سے دِل دبائے ہوئے ہُوں مزارمیں
تم نے تو ہاتھ جوروسِتم سےاُٹھالیا
اب کیا مزہ رہا سِتَمِ روزگار میں
اے پردہ دار، اب تونکل آ کہ حشْرہے
دنیا کھڑی ہوئی ہے ترے انتظار میں
عمرِ دراز، مانگ کے لائی تھی چار دن
دو آرزو میں کٹ گئے دو انتظار میں
سیماب پھول اُگیں لحدِعندلیب سے
اتنی تو تازگی ہو، ہوائے بہار میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رہیں گے چل کے کہیں اوراگر یہاں نہ رہے
بَلا سے اپنی جو آباد گُلِستاں نہ رہے
ہم ایک لمحہ بھی خوش زیرِ آسماں نہ رہے
غنیمت اِس کوسَمَجْھیے کہ جاوِداں نہ رہے
ہمیں تو خود چَمن آرائی کا سلیقہ ہے
جو ہم رہے توگُلِسْتاں میں باغباں نہ رہے
شباب نام ہے دل کی شگفتہ کاری کا
وہ کیا جوان رہے جس کا دل جواں نہ رہے
حرم میں، دَیروکلیسا میں، خانقاہوں میں
ہمارے عشق کے چرچے کہاں کہاں نہ رہے
کبھی کبھی، رہی وابستگی قفس سے بھی
رہے چمن میں تو پابندِ آشیاں نہ رہے
فضائے گل ہے نظرکش و مَن ہے دامن کش
کہاں رہے تِرا آوارہ سر، کہاں نہ رہے
بہار جن کے تبسّم میں مُسکراتی تھی
وہ گُلِسْتاں وہ جوانانِ گُلِسْتاں نہ رہے
خدا کے جاننے والے تو خیر کچھ تھے بھی
خدا کے ماننے والے بھی اب یہاں نہ رہے
ہمیں قفس سے کریں یاد پھر چمن والے
جب اور کوئی ہوا خواہِ آشیاں نہ رہے
کِیا بھی سجدہ تو دل سے کِیا نظر سے کِیا
خدا کا شُکر کہ ہم بارِ آستاں نہ رہے
ہےعصرِنَو سے یہ اِک شرط انقلاب کے بعد
ہم اب رہیں جو زمیں پر تو آسماں نہ رہے
براہِ راست تعلّق تھا جن کا منزل سے
وہ راستے نہ رہے اب وہ کارواں نہ رہے
ہَمِیں خرابِ ضعیفی نہیں ہوئے سیماب
ہمارے وقت کے اکثر حَسِیں جواں نہ رہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب کیا بتائیں عمرِ وفا کیوں خراب کی
نوحہ ہے زندگی کا کہانی شباب کی
تم نے خبر نہ لی مِرے حالِ خراب کی
کالی ہوئیں فراق میں راتیں شباب کی
تھی الوداعِ ہوشِ تجلّئِ مختصر
میرا تو کام کرگئی جنْبش نقاب کی
وہ میرے ساتھ ساتھ مُجسّم تِرا خیال
وہ جنگلوں میں سیر شبِ ماہتاب کی
ممنُون ہوں تِری نگۂِ بے نیاز کا
رُسوائیاں تو ہیں مِرے حالِ خراب کی
میں اپنی جلوہ گاہِ تصوّر سجاؤں گا
تصویرکھینچ دے کوئی اُن کے شباب کی
دیدو غبارِ دل میں ذرا سی جگہ ہمیں
تربت بنائیں گے دلِ خانہ خراب کی
گھبرا کے جس سے چیخ اُٹھا عالَمِ وجُود
وہ چیز دل نے میرے لئے اِنتخاب کی
چمکیں تو خوفناک، گِرَیں تو حیات سوز
ساون کی بجلیاں ہیں نگاہیں عتاب کی
سیماب زندگی کی ہے تاریخ ہرغزل
ہرشعرمیں ہے ایک کہانی شباب کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تم مِرے پاسِ رہو، پاسِ ملاقات رہے
نہ کرو بات کسی سے تو مِری بات رہے
ہو سرافرازِ یقیں، حدّ ِ تصّور سے گُزر
وہ بھی کیا عشق جو پابندِ خیالات رہے
میں نے آنکھوں سے نہ دیکھی سَحَرِشامِ فراق
شمْع سے پہلے بُجھا ایک پہررات رہے
ذہْن ماؤف، دِل آزردہ، نگاہیں بے کیف
مر ہی جاؤں گا جو چندے یہی حالات رہے
دَیر میں آنے کی تکلیف تو کی ہے سیماب
یاد کعبے کی بھی اے قبلۂ حاجات رہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہَمَیں تو یوں بھی نہ جلوے تِرے نظرآئے
نہ تھا حجاب، توآنکھوں میں اشک بھرآئے
ذرا سی دیر میں دُنیا کی سیر کرآئے
کہ لے کے تیری خبر تیرے بے خبرآئے
اسِیر ہونے کے آثار پھر نظرآئے
قفس سے چھوٹ کر آئے تو بال وپرآئے
تجھے ملال ہے ناکامئ نظر کا فضول
نظر میں جو نہ سمائے وہ کیا نظرآئے
وہ جانتا ہے، میں پابندِ رسْم وراہ نہیں
فضول ٹھوکریں کھانے کو راہبرآئے
تمام عمْر یہ ناکامیاں قیامت ہیں
کبھی کبھی تو الٰہی، اُمید بر آئے
جسے تصرفِ تیرِ نظر نہ ہو معلوم
وہ تیرے سامنے لے کے دل و جگرآئے
شریکِ قسمتِ تنہائیِ فراق ہوں میں
اجل بھی کیوں تِرے آنے سے پیشترآئے
بلائے جاں ہے وہ نصفِ شباب کا عالم
کسی حَسِین کی جب زلف تا کمر آئے
نگاہِ جلوہ میں شاید سما گئے سیماب
کہ منتظِر گئے لوٹے تو منتظَر آئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجھے فکر و سرِ وفا ہے ہنوز
بادۂ عِشق نارسا ہے ہنوز
بندگی نے ہزار رُخ بدلے
جو خُدا تھا، وہی خُدا ہے ہنوز
او نظر دل سے پھیرنے والے
دل تُجھی پر مِٹا ہُوا ہے ہنوز
ساری دُنیا ہو، نا اُمید تو کیا
مجھے تیرا ہی آسرا ہے ہنوز
نہ وہ سرمستِیاں نہ فصلِ شباب
عاشقی صبر آزما ہے ہنوز
دل میں تُجھ کو چُھپائے پھرتا ہوں
جیسے تُو میرا مُدّعا ہے ہنوز
آستاں سے ابھی نظر نہ ہٹا
کوئی تقدیر آزما ہے ہنوز
دل میں باقی ہے سوزِ غم شاید
ہر نَفس میں گُداز سا ہے ہنوز
محْوِیت بے سَبب نہیں سیماب
رُوح پر کوئی چھا رہا ہے ہنوز
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کیا جانے میں جانا ہے ، کہ جاتے ہو خفا ہو کر !
میں جب جانُوں مِرے دل سے چلے جاؤ جُدا ہو کر
تصور آپ کا، کیا کیا فریبِ جلوہ دیتا ہے
کہ رہ جاتا ہُوں میں اکثر، ہم آغوشِ ہوا ہو کر
وہ پروانہ ہُوں، میری خاک سے بنتے ہیں پروانے
وہ دیپک ہُوں، کہ انگارے اُڑاتا ہُوں فنا ہو کر
قیامت تک اُڑے گی دِل سے اُٹھ کر خاک آنکھوں تک
اِسی راستے گیا ہے، حسرتوں کا قافلا ہو کر
تُمِھیں اب دردِ دل کے نام سے گھبرائے جاتے ہو !
تُمِھیں تو دِل میں شاید آئے تھے درد آشنا ہو کر
یُونہی ہم تُم گھڑی بھر کو مِلا کرتے تو بہتر تھا !
یہ دونوں وقت جیسے روزمِلتے ہیں جُدا ہوکر
یقینی حشر میں سیماب اُن کی دید ہے لیکن !
وہ پھر پردے میں جا بیٹھے اگر جلوہ نما ہوکر؟
۔۔۔۔۔۔۔۔۔۔۔۔۔۔۔۔۔۔۔۔۔۔
نسیم ﺻﺒﺢ ﮔﻠﺸﻦ ﻣﯿﮟ ﮔﻠﻮﮞ ﺳﮯ ﮐﮭﯿﻠﺘﯽ ﮨﻮﮔﯽ
ﮐﺴﯽ ﮐﯽ ﺁﺧﺮﯼ ﮨﭽﮑﯽ ﮐﺴﯽ ﮐﯽ ﺩﻝ ﻟﮕﯽ ﮨﻮﮔﯽ
ﺗﺠﮭﮯ ﺩﺍﻧﺴﺘﮧ ﻣﺤﻔﻞ ﻣﯿﮟ ﺟﻮ ﺩﯾﮑﮭﺎ ﮨﻮ ﺗﻮ ﻣﺠﺮﻡ ﮨﻮﮞ
ﻧﻈﺮ ﺁﺧﺮ ﻧﻈﺮ ﮨﮯ ﺑﮯ ﺍﺭﺍﺩﮦ ﺍﭨﮫ ﮔﺌﯽ ﮨﻮﮔﯽ
ﻣﺰﮦ ﺁ ﺟﺎﺋﮯ ﮔﺎ ﻣﺤﺸﺮ ﻣﯿﮟ ﮐﭽﮫ ﺳﻨﻨﮯ ﺳﻨﺎﻧﮯ ﮐﺎ
ﺯﺑﺎﮞ ﮨﻮﮔﯽ ﮨﻤﺎﺭﯼ ﺍﻭﺭ ﮐﮩﺎﻧﯽ ﺁﭖ ﮐﯽ ﮨﻮﮔﯽ
ﯾﮩﯽ ﻋﺎﻟﻢ ﺭﮨﺎ ﭘﺮﺩﮦ ﻧﺸﯿﻨﯽ ﮐﺎ ﺗﻮ ﻇﺎﮨﺮ ﮨﮯ
ﺧﺪﺍﺋﯽ ﺁﭖ ﺳﮯ ﮨﻮﮔﯽ ﻧﮧ ﮨﻢ ﺳﮯ ﺑﻨﺪﮔﯽ ﮨﻮﮔﯽ
ﺗﻌﺠﺐ ﮐﯿﺎ ﻟﮕﯽ ﺟﻮ ﺁﮒ ﺍﮮ ﺳﯿﻤﺎﺏؔ ﺳﯿﻨﮯ ﻣﯿﮟ
ﮨﺰﺍﺭﻭﮞ ﺩﻝ ﻣﯿﮟ ﺍﻧﮕﺎﺭﮮ ﺑﮭﺮﮮ ﺗﮭﮯ ﻟﮓ ﮔﺌﯽ ﮨﻮﮔﯽ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ خالد محمود