آج ممتاز نعت گو شاعر مظفرؔ وارثی کا یوم وفات ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مظفر ؔوارثی کا پورا نام محمد مظفر الدین احمدصدیقی تھا۔ وہ 23دسمبر 1933ء کو میرٹھ کے محلہ سرائے بیگم میں علامہ صوفی وارثی میرٹھی کے ہاں پیدا ہوئے، جو جمعیت علمائے ہند سے وابستہ اہم سیاسی شخصیت اور علامہ محمد اقبالؒ کے قریبی دوستوں میں شامل تھے۔ -
آپ نے اسٹیٹ بینک میں بطور آفیسر جاب
کی ۔
انہوں نے 20 کے قریب کتابیں تصنیف کیں۔ اور نعتیہ اور حمدیہ کلام میں نئی جدت کی بنیاد رکھی۔ سادہ الفاظ ، مختصر فقرات ، اور عشق و ادب کی انتہا ان کے کلام کا خاصا رہی ہے۔
انہوں نے فلمی گیت اور غزلیں بھی لکھیں۔ غزلوں میں ان کا تخیل بھی دوسرے شعراء سے ہٹ کر تھا۔ لیکن ان کی اصل وجہ شہرت نعتیہ اور حمدیہ کلام تھا۔ "اے خدا ، اے خدا" ، "میرا پیمبر عظیم تر ہے" اور "کوئی تو ہے جو نظامِ ہستی چلا رہا ہے ، وہی خدا ہے" جیسے دل کو چھو لینے والے کلام اس کی ایک مثال ہیں۔ وہ خود بھی صاحبِ طرز شاعر تھے اور اپنا کلام خوب پڑھتے تھے۔ ان کی ادبی خدمات کے اعتراف میں انہیں پرائڈ آف پرفارمنس کے ایوارڈ سے بھی نوازا گیا۔ ان کی غزل گوئی کو اکثر نظر انداز کیا جاتا رہا۔ دوسرے شعراء نے ان کو کبھی اتنا نہیں سراہا۔ اس وجہ سے وہ بطور غزل گو شاعر زیادہ نہیں پہچانے گیے۔ حالانکہ ان کی کہی ہوئی غزلوں میں عقل و دانش کے کئی نیے در کھلتے نظر آتے ہیں۔
وہ رعشہ کے مرض میں مبتلا تھے۔ اور 28 جنوری 2011 کو لاہور میں انتقال فرما گئے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منتخب کلام:
ﮐﻮﺋﯽ ﺗﻮ ﮨﮯ ﺟﻮ ﻧﻈﺎﻡ ﮨﺴﺘﯽ ﭼﻼ ﺭﮨﺎ ﮨﮯ
ﻭﮨﯽ ﺧﺪﺍ ﮨﮯ
ﺩﮐﮭﺎﺋﯽ ﺑﮭﯽ ﺟﻮ ﻧﮧ ﺩﮮ، ﻧﻈﺮ ﺑﮭﯽ ﺟﻮ ﺁ ﺭﮨﺎ ﮨﮯ
ﻭﮨﯽ ﺧﺪﺍ ﮨﮯ
ﻭﮨﯽ ﻣﺸﺮﻕ، ﻭﮨﯽ ﻣﻐﺮﺏ
ﺳﻔﺮ ﮐﺮﻳﮟ ﺳﺐ ﺍُﺳﯽ ﮐﯽ ﺟﺎﻧﺐ
ﮨﺮ ﺁﺋﯿﻨﮯ ﻣﯿﮟ ﺟﻮ ﻋﮑﺲ ﺍﭘﻨﺎ ﺩِﮐﮭﺎ ﺭﮨﺎ ﮨﮯ
ﻭﮨﯽ ﺧﺪﺍ ﮨﮯ
ﺗﻼﺵ ﺍُﺱ ﮐﻮ ﻧﮧ ﮐﺮ ﺑﺘﻮﮞ ﻣﯿﮟ
ﻭﮦ ﮨﮯ ﺑﺪﻟﺘﯽ ﮨﻮﺋﯽ ﺭُﺗﻮﮞ ﻣﯿﮟ
ﺟﻮ ﺩﻥ ﮐﻮ ﺭﺍﺕ ﺍﻭﺭ ﺭﺍﺕ ﮐﻮ ﺩﻥ ﺑﻨﺎ ﺭﮨﺎ ﮨﮯ
ﻭﮨﯽ ﺧﺪﺍ ﮨﮯ
ﻧﻈﺮ ﺑﮭﯽ ﺭﮐﮭﮯ سماعتیں ﺑﮭﯽ
ﻭﮦ ﺟﺎﻥ ﻟﯿﺘﺎ ﮨﮯ ﻧﯿﺘﯿﮟ ﺑﮭﯽ
ﺟﻮ ﺧﺎﻧﮧ ﻻﺷﻌﻮﺭ ﻣﯿﮟ ﺟﮕﻤﮕﺎ ﺭﮨﺎ ﮨﮯ
ﻭﮨﯽ ﺧﺪﺍ ﮨﮯ
ﮐﺴﯽ ﮐﻮ ﺳﻮﭼﻮﮞ ﻧﮯ ﮐﺐ ﺳﺮﺍﮨﺎ
ﻭﮨﯽ ﮨﻮﺍ ﺟﻮ ﺧﺪﺍ ﻧﮯ ﭼﺎﮨﺎ
ﺟﻮ ﺍﺧﺘﯿﺎﺭِ ﺑﺸﺮ ﭘﮯ ﭘﮩﺮﮮ ﺑﭩﮭﺎ ﺭﮨﺎ ﮨﮯ
ﻭﮨﯽ ﺧﺪﺍ ﮨﮯ
ﮐﺴﯽ ﮐﻮ ﺗﺎﺝ ﻭﻗﺎﺭ ﺑﺨﺸﮯ،ﮐﺴﯽ ﮐﻮ ﺫلت ﮐﮯ ﻏﺎﺭ ﺑﺨﺸﮯ
ﺟﻮ ﺳﺐ ﮐﮯ ﻣﺎﺗﮭﮯ ﭘﮯ ﻣﮩﺮ ﻗﺪﺭﺕ ﻟﮕﺎ ﺭﮨﺎ ﮨﮯ
ﻭﮨﯽ ﺧﺪﺍ ﮨﮯ
ﺳﻔﯿﺪ ﺍﺳﮑﺎ، ﺳﯿﺎﮦ ﺍﺳﮑﺎ، ﻧﻔﺲ ﻧﻔﺲ ﮔﻮﺍﮦ ﺍﺳﮑﺎ
ﺟﻮ ﺷﻌﻠﮧ ﺟﺎﮞ ﺟﻼ ﺭﮨﺎ ﮨﮯ، ﺑﺠﮭﺎ ﺭﮨﺎ ﮨﮯ
ﻭﮨﯽ ﺧﺪﺍ ﮨﮯ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرا پیمبر عظیم تر ہے
کمالِ خلاق ذات اُس کی
جمالِ ہستی حیات اُس کی
بشر نہیں عظمتِ بشر ہے
مرا پیمبر عظیم تر ہے
وہ شرحِ احکام حق تعالیٰ
وہ خود ہی قانون خود حوالہ
وہ خود ہی قرآن خود ہی قاری
وہ آپ مہتاب آپ ہالہ
وہ عکس بھی اور آئینہ بھی
وہ نقطہ بھی خط بھی دائرہ بھی
وہ خود نظارہ ہے خود نظر ہے
مرا پیمبر عظیم تر ہے
شعور لایا کتاب لایا
وہ حشر تک کا نصاب لایا
دیا بھی کامل نظام اس نے
اور آپ ہی انقلاب لایا
وہ علم کی اور عمل کی حد بھی
ازل بھی اس کا ہے اور ابد بھی
وہ ہر زمانے کا راہبر ہے
مرا پیمبر عظیم تر ہے
وہ آدم و نوح سے زیادہ
بلند ہمت بلند ارادہ
وہ زُہدِ عیسیٰ سے کوسوں آ گے
جو سب کی منزل وہ اس کا جادہ
ہر اک پیمبر نہاں ہے اس میں
ہجومِ پیغمبراں ہے اس میں
وہ جس طرف ہے خدا ادھر ہے
مرا پیمبر عظیم تر ہے
بس ایک مشکیزہ اک چٹائی
ذرا سے جَو ایک چارپائی
بدن پہ کپڑے بھی واجبی سے
نہ خوش لباسی نہ خوش قبائی
یہی ہے کُل کائنات جس کی
گنی نہ جائيں صفات جس کی
وہی تو سلطانِ بحرو بر ہے
مرا پیمبر عظیم تر ہے
جو اپنا دامن لہو میں بھر لے
مصیبتیں اپنی جان پر لے
جو تیغ زن سے لڑے نہتا
جو غالب آ کر بھی صلح کر لے
اسیر دشمن کی چاہ میں بھی
مخالفوں کی نگاہ میں بھی
امیں ہے صادق ہے معتبر ہے
میرا پیمبر عظیم تر ہے
جسے شاہِ شش جہات دیکھوں
اُسے غریبوں کے ساتھ دیکھوں
عنانِ کون و مکاں جو تھامے
خدائی پر بھی وہ ہاتھ دیکھوں
لگے جو مزدور شاہ ایسا
نذر نہ دَھن سربراہ ایسا
فلک نشیں کا زمیں پہ گھر ہے
میرا پیمبر عظیم تر ہے
وہ خلوتوں میں بھی صف بہ صف بھی
وہ اِس طرف بھی وہ اُس طرف بھی
محاذ و منبر ٹھکانے اس کے
وہ سربسجدہ بھی سربکف بھی
کہیں وہ موتی کہیں ستارہ
وہ جامعیت کا استعارہ
وہ صبحِ تہذیب کا گجر ہے
میرا پیمبر عظیم تر ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یا رحمتہ العالمیں.
یا رحمتہ العالمیں
الہام جامہ ہے تیرا
قرآں عمامہ ہے تیرا
منبر تیرا عرشِ بریں
یا رحتمہ العالمیں
آئینہء رحمت بدن
سانسیں چراغِ علم و فن
قربِ الٰہی تیرا گھر
الفقر و فخری تیرا دھن
خوشبو تیری جوئے کرم
آنکھیں تیری بابِ حرم
نُورِ ازل تیری جبیں
یا رحمتہ العالمیں
تیری خموشی بھی اذاں
نیندیں بھی تیری رتجگے
تیری حیاتِ پاک کا
ہر لمحہ پیغمبر لگے
خیرالبشر رُتبہ تیرا
آوازِ حق خطبہ تیرا
آفاق تیرے سامعیں
یا رحمتہ العالمیں
قبضہ تیری پرچھائیں کا
بینائی پر ادراک پر
قدموں کی جنبش خاک پر
اور آہٹیں افلاک پر
گردِ سفر تاروں کی ضَو
مرقب براقِ تیز رَو
سائیس جبرئیلِ امیں
یا رحمتہ العالمیں
تو آفتابِ غار بھی
تو پرچم ِ یلغار بھی
عجز و وفا بھی ، پیار بھی
شہ زور بھی سالار بھی
تیری زرہ فتح و ظفر
صدق و وفا تیری سپر
تیغ و تبر صبر و یقیں
یا رحمۃ للعالمیں
پھر گڈریوں کو لعل دے
جاں پتھروں میں ڈال دے
حاوی ہوں مستقبل پہ ہم
ماضی سا ہم کو حال دے
دعویٰ ہے تیری چاہ کا
اس امتِ گُم راہ کا
تیرے سوا کوئی نہیں
یا رحمتہ العالمیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نہ میرے سخن کو سخن کہو
نہ مری نوا کو نوا کہو
میری جاں کو صحنِ حرم کہو
مرے دل کو غارِ حرا کہو
میں لکھوں جو مدحِ شہہِ اُمم
اور جبرائیل بنیں قلم
میں ہوں ایک ذرہء بےدرہم
مگر آفتابِ ثناء کہو
طلبِ شہہِ عربی کروں
میں طوافِ حُبِ نبی کروں
مگر ایک بےادبی کروں
مجھے اُس گلی کا گدا کہو
نہ دھنک، نہ تارا، نہ پھول ہوں
قدمِ حضور کی دُھول ہوں
میں شہیدِ عشقِ رسول ہوں
میری موت کو بھی بقا کہو
جو غریب عشق نورد ہو
اُسے کیوں نہ خواہشِ درد ہو
میرا چہرہ کتنا ہی زرد ہو
میری زندگی کو ہرا کہو
ملے آپ سے سندِ وفا
ہوں بلند مرتبہء صفا
میں کہوں محمدِ مصطفیٰ
کہو تم بھی صلے علیٰ کہو
وہ پیام ہیں کہ پیامبر
وہ ہمارے جیسا نہیں مگر
وہ ہے ایک آئینہء بشر
مگر اُس کو عکسِ خدا کہو
یہ مظفر ایسا مکین ہے
کہ فلک پہ جس کی زمین ہے
یہ سگِ براق نشین ہے
اسے شہسوارِ صبا کہو
۔۔۔۔۔۔۔۔۔۔۔۔۔۔۔۔
محشر میں قُربِ داورِ محشر ملا مجھے
ایسا پیمبروں کا پیمبر ملا مجھے
اللہ کو سُنانے لگا نعتِ مصطفےٰ
جب سایہء رسول کا منبر ملا مجھے
کِھلتی، مہکتی، بھیگتی راتوں کے موڑ پر
وہ حجرہء درود میں اکثر ملا مجھے
میں وادیء حرم تک اُسے ڈھونڈنے گیا
آواز دی تو اپنے ہی اندر ملا مجھے
قدموں میں مصطفےٰ کے رہا، جتنے دن رہا
پردیس میں بھی کتنا حسیں گھر ملا مجھے
دیکھا جو غرق ہو کے محمد کی ذات میں
دونوں جہاں کا مرکز و محور ملا مجھے
مانگے تھے چند پُھول ، بہاریں عطا ہُوئیں
جو کچھ ملا ، بساط سے بڑھ کر ملا مجھے
اِک صبح سی ٹھہر گئی میرے وجود میں
جس دن سے اُن کا عشق مظفر ملا مجھے
۔۔۔۔۔۔۔۔۔۔۔۔۔۔۔۔
تو کجا من کجا
تو امیرِ حرم، میں فقیرِعجم
تیرے گن اور یہ لب، میں طلب ہی طلب
تو عطا ہی عطا، میں خطا ہی خطا
تو کجا من کجا، تو کجا من کجا
تو ابد آفریں، میں ہوں دو چار پل
تو یقیں میں گماں، میں سخن تُو عمل
تو ہے معصومیت میں نری معصیت
تو کرم میں خطا، تو کجا من کجا
تو ہے احرامِ انوار باندھے ہوئے
میں درودوں کی دستار باندھے ہوئے
کعبۂ عشق تو، میں ترے چار سو
تو اثر میں دعا، تو کجا من کجا
تو حقیقت ہے میں صرف احساس ہوں
تو سمندر، میں بھٹکی ہوئی پیاس ہوں
میرا گھر خاک پر اور تری رہگزر
سدرۃ المنتہیٰ، تو کجا من کجا
میرا ہر سانس تو خوں نچوڑے مرا
تیری رحمت مگر دل نہ توڑے مرا
کاسۂ ذات ہوں، تیری خیرات ہوں
تو سخی میں گدا، تو کجا من کجا
ڈگمگاٰؤں جو حالات کے سامنے
آئے تیرا تصور مجھے تھامنے
میری خوش قسمتی، میں ترا اُمتی
تو جزا میں رضا، تو کجا من کجا
میرا ملبوس ہے پردہ پوشی تری
مجھ کو تابِ سخن دے خموشی تری
تو جلی میں خفی، تو اٹل میں نفی
تو صلہ میں گلہ، تو کجا من کجا
دوریاں سامنے سے جو ہٹنے لگیں
جالیوں سے نگاہیں لپٹنے لگیں
آنسوؤں کی زباں ہو میری ترجماں
دل سے نکلے سدا، تو کجا من کجا
تو امیر ِحرم، میں فقیرِعجم
تیرے گن اور یہ لب، میں طلب ہی طلب
تو عطا ہی عطا، میں خطا ہی خطا
تو کجا من کجا،تو کجا من کجا
۔۔۔۔۔۔۔۔۔۔۔۔۔۔۔۔۔۔۔
جا زندگی مدینے سے جھونکے ہوا کے لا
شاید حضور ہم سے خفا ہیں منا کے لا
ٹکڑوں میں بٹ گئی ہے امت رسول کی
ابوبکر سے کچھ آئینے صدق و صفا کے لا
دنیا بہت ہی تنگ مسلماں پہ ہو گئی
فاروق کے زمانے کے نقشے اٹھا کے لا
گمراہ کر دیا ہے نظر کے فریب نے
عثمان سے زاویے ذرا شرم و حیا کے لا
یورپ میں مارا مارا نہ پھرئے گدائے علم
دروازہ علی سے یہ خیرات جا کے لا
باطل سے دب رہی ہے امت رسول کی
منظر ذرا حسین سے کچھ کربلا کے لا
جا زندگی مدینے سے جھونکے ہوا کے لا
شاید حضور ہم سے خفا ہیں منا کے لا
۔۔۔۔۔۔۔۔۔۔۔۔۔۔۔۔۔۔۔۔
غزل
میری تصویر میں رنگ اور کسی کا تو نہیں
گھیر لیں مجھ کو سب آنکھیں ، میں تماشا تو نہیں
زندگی تجھ سے ہر اک سانس پہ سمجھوتا کروں
شوق جینے کا ہے مجھ کو ، مگر اتنا تو نہیں
روح کو درد ملا ، درد کو آنکھیں نہ ملیں
تجھ کو محسوس کیا ہے ، تجھے دیکھا تو نہیں
سوچتے سوچتے دل ڈوبنےلگتا ہے مرا
ذہن کی تہ میں مظفر کوئی دریا تو نہیں
۔۔۔۔۔۔۔۔۔۔۔۔۔۔۔۔۔۔۔۔
غزل
ہم کیوں یہ کہیں کوئی ہمارا نہیں ہوتا
موجوں کے لیے کوئی کنارہ نہیں ہوتا
دل ٹوٹ بھی جاۓ تو محبت نہیں مٹتی
اس راہ میں لٹ کر بھی خسارا نہیں ہوتا
سرمایہء شب ہوتے ہیں یوں تو سبھی ستارے
ہر تارہ مگر صبح کا تارا نہیں ہوتا
اشکوں سے کہیں مٹٹا ہے احساس تلون
پانی میں جو گھل جاۓ وہ پارا نہیں ہوتا
سونے کی ترازو میں مرا درد نہ تولو
امداد سے غیرت کا گزارہ نہیں ہوتا
تم بھی تو مظفرؔ کی کسی بات پہ بولو
شاعر کا ہی لفظوں پہ اجارہ نہیں ہوتا
۔۔۔۔۔۔۔۔۔۔۔۔۔۔۔۔۔۔
غزل
ہم کریں بات دلیلوں سے ،تو رد ہوتی ہے
اس کے ہونٹوں کی خموشی بھی سند ہوتی ہے
سانس لیتے ہوئے انساں بھی ہے لاشوں کی طرح
اب دھڑکتے ہوئے دل کی بھی لحد ہوتی ہے
اپنی آواز کے پتھر بھی نہ اس تک پہنچے
اس کی آنکھوں کے اشارے میں بھی زد ہوتی ہے
جس کی گردن میں ہے پھندا وہی انسان بڑا
سولیوں سے یہاں پیمائش قد ہوتی ہے
شعبدہ گر بھی پہنتے ہیں خطیبوں کا لباس
بولتا جہل ہے بدنام خرد ہوتی ہے
کچھ نہ کہنے سے بھی چھن جاتا ہے اعزاز سخن
ظلم سہنے سے بھی ظالم کی مدد ہوتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بشکریہ خالد محمود